கார்காலம் - நாவல்

அதிகாரம் 07 -  புரியாத புதிர்

ஆலினைப் பற்றிய தகவல்கள் எல்லாம் தொழிற்சாலை முழுவதும் வெளியான பின்னர், மிக்கெய்ல் என்னும் சுவீடன் நாட்டவன் ஒருவன் அவளுடன் மிக நெருக்கமாகப் பழகத்தொடங்கினான். அவனது மனைவி ஒரு பிலிப்பைன்ஸ் நாட்டுக்காரி என்பதுவும் ஒரு காரணமாக இருக்கக்கூடும்.

அவுஸ்திரேலியாவில் இலங்கை இந்திய நாட்டுக்காரர்கள், பிலிப்பைன்ஸ் நாட்டுக்காரர்களை திருமணம் புரிந்துள்ளார்கள். அதுவும் கூடுதலாக ஆண்கள்தான் பிலிப்பைன்ஸ் நாட்டுப் பெண்களைத் திருமணம் செய்துள்ளார்கள். ஆனால் வியட்நாமியர்களையோ சீனர்களையோ கலப்புத்திருமணம் செய்வது ஒப்பீட்டு ரீதியில் குறைவாகவே இருக்கிறது.

மிக்கெய்லும் ஆலினும் கதைக்கும் போதும், ஒன்று சேர்ந்து நடக்கும்போதும் வேடிக்கையாக இருக்கும். மிக்கெய்ல் ஆலினைவிட  இரண்டரை மடங்கு உயரமும் பருமனும் கொண்டவன். பொதுவாக அவன் அவளுடன் கதைப்பதெல்லாம் கிறிஸ்தவ மதம் பற்றித்தான். அவளுக்கு அதில் நாட்டம் இருந்ததாகத் தெரியவில்லை. ஒருதடவை 'ரென் கொமன்மென்ற்ஸ்' என்று எழுதிய பேனை ஒன்றை மிக்கெய்ல் அவளிற்கு பரிசாகக் கொடுத்தான். அவளுக்கு மிக்கெய்லினது செய்கைகளும் மதம் பற்றிய போதனைகளும் சலிப்பைக் கொடுத்தன. இருந்தும் காட்டிக் கொள்ளாதவளாக நடந்து கொண்டாள்.

கார்காலம் - நாவல்

அதிகாரம் 6 -  விவாகரத்து

நந்தனின் மகள் அப்பொழுது ஆறாம் வகுப்புப் படித்துக் கொண்டிருந்தாள். அவளுக்குத் தெரியாத கணக்குகளை நந்தன் சிலவேளைகளில் வேலை செய்யுமிடத்தில் வைத்து செய்து பார்ப்பதுண்டு. வேலை செய்யுமிடத்தில் இவற்றிற்கெல்லாம் அனுமதியில்லை என்பதால் இரகசியமாகத்தான் செய்வான். சாப்பாட்டு நேரத்தின்போது அல்லது நேரம் கிடைக்கும் போதெல்லாம் அந்தக் கணக்குகளுடன் போராடிக்கொண்டிருப்பான் அவன்.

இங்கே மாணவர்கள் தமது 6ஆம் வகுப்பிலும் 12 ஆம் வகுப்பிலும் கல்வியில் விழிப்பாக இருக்க வேண்டும். ஆரம்ப பாடசாலையில் இருந்து இடைநிலைப் பாடசாலைக்கோ, அல்லது இடைநிலையிலிருந்து உயர்தரத்திற்கோ போகும்போது நல்ல பாடசாலைக்குப் போக வேண்டுமாயின் போட்டிப்பரீட்சைக்குத் தோற்ற வேண்டும். போட்டிப் பரீட்சைகள் மிகவும் கடுமையானவை.

கார்காலம் - நாவல்

அதிகாரம் 5 -  வேலை

இரண்டு வாரங்களுக்கு முன்னர் ‘ரீம் லீடர்’ பதவிக்கு நேர்முகப்பரீட்சை நடந்திருந்தது. அதில் நந்தன் தெரிவு செய்யப்பட்டிருந்தான். ஆலின் வந்த நேரம் நந்தனுக்குப் பதவி உயர்வு என ஒகாரா நக்கல் அடித்தான். ‘ரொப் கோற்’றிலேயே நந்தன் ரீம் லீடராக இருந்தான்.

நந்தனுடன் படித்தவர்களில் சிலர் அவுஸ்திரேலியாவின் மூலை முடுக்குகளிலெல்லாம் சென்று, படித்த படிப்பிற்கான வேலையைத் தேடிவிட்டு, பின்னர் அங்கிருந்து கொண்டு நகரங்களை நோக்கி வரத் தொடங்கினார்கள். இவனோ நகரத்திலே இருந்துகொண்டு ஒரு கடைநிலை வேலையில் சேர்ந்துவிட்டு பின்னர் படிப்படியாக வேலையில் முன்னேறினான். குடும்பநிலை, உடல் ஆரோக்கியம், பொருளாதாரத்தைப் பொறுத்தே ஒவ்வொருவருடைய நிலையும் அமைகிறது. வாழ்க்கை சமரசங்களுக்கு உட்பட்டது என்பது நந்தனின் வாதம். வாழ்வதற்காகப் படிப்பா? படிப்பதற்காக வாழ்வா?

கார்காலம் - நாவல்

அதிகாரம் நான்கு - மெல்பேர்ண் வானிலை 

கோடைகாலம் தொடங்கிவிட்டது. நேற்று அனலாகக் காற்று வீசியது. வெப்பநிலை நாற்பது பாகை செல்சியசிற்கும் மேலே போய்விட்டது. இன்றும் பகல் அனல்தான்.

நேரம் இரவு இரண்டு முப்பது. வேலை முடித்து வீடு வந்து கராஜ்ஜிற்கு முன்னால் காரை நிறுத்தினான் நந்தன்.  வேலைத் தலத்திலிருந்து நந்தனின் வீடு வர இருபது நிமிடங்கள் போதுமானது. காரைவிட்டு இறங்கும்போது கடும் குளிராக இருந்தது. மெல்பேர்ண் வானிலை பற்றி தீர்க்கமாக எதுவும் கூறமுடியாது. நேரத்திற்கு நேரம் மாறுபடும். நம்பி எதுவும் செய்ய முடியாது.

வீட்டைத் திறந்து கொண்டிருக்கும்போது - பின்னாலே இரண்டு வாகனங்கள் பிரதானவீதியிலிருந்து திரும்பி ஒளி வெள்ளம் பாய்ச்சியபடியே இவன் வீட்டுப் பக்கமாக வந்தன. இவன் தன்னை யாராவது நோட்டம் விடுவதற்காக வந்தார்களா என அறிவதற்காக, வீட்டிற்குள் சென்று யன்னல் சீலையை விலக்கி மறைந்து நின்று பார்த்தான். ஒன்று கார், மற்றது குளூகர். இரண்டும் வீதியில் மெதுவாக நின்றன. இயந்திரங்கள் நின்று, ஒளியும் அணைந்தன. நல்ல நிலவு வெளிச்சம். குளூகரிற்குள் இருந்த பெண் இவன் வேலை செய்யும் இடத்தில் இன்னொரு பகுதியில் வேலை செய்யும் கிறீக் நாட்டுப்பெண் ஆச்சிமா. மற்றக் காரிற்குள் இருந்தவன் அல்பேற்றோ. சிறிது நேரம் சுற்றுப்புறம் அமைதியாக இருந்தது. பின்பு அல்பேற்றோ தனது காரில் இருந்து இறங்கி ஆச்சிமாவின் குளூகரிற்குள் ஏறினான். சற்று நேரத்தில் ’கார்’ இயங்கத் தொடங்கியது.

கார் காலம் - நாவல்

அதிகாரம் மூன்று - ’ஒகாரா’

”நந்தன் திருமணமானவனா?”

நந்தன் அவுஸ்திரேலியாவிற்குப் புறப்படத் தயாரானபோது அவனுக்கொரு கலியாணத்தைச் செய்து வைத்தார்கள். உறவுக்குள் அமைந்த சம்பந்தம். கட்டாயத்தின் நிமிர்த்தம் செய்ய வேண்டியிருந்தது. பெண்ணுக்கு நல்ல நீட்டுத் தலைமயிர், வெள்ளை நிறம், பல்கலைக்கழகத்தில் படித்தவள் என்று சொல்லிச் செய்து வைத்தார்கள். அவர்கள் குடும்பம் நீண்ட நாட்களாக வெளிநாடுகளில் வாழ்ந்து வந்தது. தகப்பனாரின் தொழில் நிமிர்த்தம் அவர்கள் அடிக்கடி நாடு விட்டு நாடு மாறினார்கள். குடும்பத்தில் ஒரே பெண்பிள்ளை என்ற செல்லம், வெளிநாட்டில் வேலை பார்த்ததால் நுனிநாக்கு இங்கிலிஸ் எல்லாம் அவளின் தலைக்கனத்தை உயர்த்தி வைத்தன.

வெளியே தெரியாவிட்டாலும், மனதளவில் மகிழ்ச்சியில்லாமல் அவர்கள் குடும்பவண்டில் ஓடியது. பட்டதாரி என்ற அகம்பாவமும் வேலை செய்கின்றேன் என்ற திமிரும் அவளிடம் தலை தூக்கியது. அடிக்கடி அவளின் வாய் நீண்டுகொண்டே வந்தது.

இந்த இடத்தில் ஒகாராவைப் பற்றி சிறிது சொல்ல வேண்டும்.